蛋多士 (附食譜)

小蚌公司附近有間茶餐廳, 有個煎蛋包, 每次小蚌去都飲下午茶, 都會點呢個包.  

乜嘢係煎蛋包 ......咪就係將荷包蛋放響塊方包上面. 

一口咬落個包度, 方包夾住d蛋汁, 又真係幾好味.  不過食既時候要小心, 因為d蛋汁就好容易漏出.  

有次同個朋友去食, 佢就教我用呢個方法煮... 

我試煮, d蛋汁又真係無咁容易漏出嚟...


蛋多士  (1人份)

材料  :  方包  1塊  /  蛋  1隻

做法

1.  先將方包中間用餐刀切一個正方型.

2.  然後用細火煎2分鐘(不用放食油)

3.  跟住在方包中間部份放1 茶匙食油, 油熱後放蛋. 

4.  煎至蛋白凝固,  將切出來既正方型方包放回方包中間.  

再煎2分鐘, 便可出鍋.

睇睇, d蛋汁真係無咁容易漏出嚟喎....

蕃茄炒蛋 (附食譜)

蕃茄炒蛋呢個餸係小蚌其中之一個最愛, 所以佢對呢個餸要求特別高.  我次次煮呢個餸, 佢都會有講呢句...

"點解個汁水汪注既"....

因為我次次都唔記得呢個餸既重點.....

就係.......

打獻.....


蕃茄炒蛋   (4人份)

材料  :  蕃茄  1斤 / 雞蛋  3隻(大型)

調味料 : 蕃茄汁  3湯匙  /  鹽  1茶匙  /  糖  2茶匙  /  生抽  1茶匙

獻汁  :  生粉  2茶匙  /  清水  1湯匙

做法

1.  先將蕃茄去皮, 去核, 切件備用.

2.  雞蛋將蛋黃, 蛋白分開後, 蛋白打至起泡, 在蛋黃內加上1茶匙生抽, 然後打勻.  之後將蛋黃倒入蛋白內, 然後打勻備用.

3.  鑊塗上厚食油, 然後燒熱, 跟著將蛋汁倒內鑊內, 將蛋炒至剛凝固.  然後拿起.

4.  燒熱油鑊, 將蕃茄放入鑊內炒熱, 將蕃茄汁, 鹽及糖放入鑊內與蕃茄炒勻, 然後放炒蛋入鑊內.

5.  蕃茄及炒蛋炒勻後, 將獻汁倒入鑊內, 炒勻後便可出鍋.

P.S.
a.  將蛋黃, 蛋白分開打, 目的是利用蛋白既空間將密度高既蛋黃分開, 所以食起上嚟, 蛋會很鬆軟.  如果覺得將蛋白蛋黃分開打麻煩, 但又想食起來滑一點.  可以燒熱油鑊, 將蛋汁倒入鑊內, 快炒至蛋汁剛凝固後便立即拿出.   

b.  蕃茄去皮, 去核的目的, 除食起來方便外, 最重要的是味道唔會太酸, 及蕃茄香味更特出...

  

蕃茄如何去皮

小蚌喜歡食蕃茄, 所以對蕃茄既要求特別高.  蕃茄必須要去皮, 去核.  佢覺得蕃茄唔去皮核, 嗰個餸會特別酸, 蕃茄味唔夠特出.  所以, 我每次都會這樣把蕃茄去皮及去核.....

1.  先燒熱一鍋水.


2.  用小刀, 割去蕃茄蒂, 在蕃茄底部界個"十"字....

3.  水滾後, 將蕃茄放入熱水內, 然後冚蓋熄火, 焗5-8分鐘...

4.  熱水倒出後, 放凍水入內, 跟住把蕃茄皮撕去....

5.  將蕃茄切開, 把核及去囊....

可以用來煮餸嘞.....



P.S.
個人認為, 把蕃茄皮, 核及囊去掉, 除了食起來會方便外, 我亦認同小蚌既講法, 無皮核, 煮出來既餸, 不但唔酸, 蕃茄味道會更特出....   

紅酒燴牛尾 (附食譜)

上個星期六見到一枝西班牙紅酒, 介紹話Full bodied, dry, fruity, spicy.  睇落幾吸引.  於是買咗.  

呢枝酒我預咗會好甜, 點知開嚟飲.  甜味及甜度對我來講係可以接受.  但佢嗰仲spicy味, 就真係唔太接受到. 
如果就咁倒咗佢, 又好折墜,  反正都諗唔到晚飯煮乜比小蚌星期二出差番嚟食.  不如就用嚟煮牛尾....

紅酒燴牛尾   (4人份)

材料 : 牛尾  1公斤  /  紅蘿蔔  1斤  / 洋蔥 1斤 /  罐裝碎蕃茄  1罐(500克)

調味料 :  
a.  香葉         乾貨~3-4塊(中型)  
     
b.  百里香     新鮮 ~ 約3克 或 乾貨 1湯匙 
     迷迭香     新鮮 ~ 1棵(約20cm長) 或 乾貨 1茶匙

c.  蕃茄膏  3湯匙  /  鹽  2茶匙  /  黑胡椒粉  2茶匙

d.  牛精  1粒(約35克)  

e.  紅酒  400毫升 / 熱水  約500毫升(或熱水份量加至蓋過牛尾)

做法

1.  牛尾放入冷水內, 水滾後5分鐘拿起, 用清水洗淨污物.

2.  紅蘿蔔, 洋蔥洗淨, 去皮, 切件內備用.

3.  燒熱油鑊, 先爆香洋蔥, 拿起, (不用洗鑊)燒熱油鑊, 爆香紅蘿蔔, 拿起, (也不用洗鑊)再燒熱油鑊, 爆香牛尾, 然後放調味料b, 跟住炒勻.  將紅蘿蔔, 洋蔥回鑊, 炒勻後便拿起放入一高身煲內.

4.  將紅酒放入牛尾內, 用大火將紅酒滾起後, 放500毫升熱水, 再滾起後將牛精及香葉放入煲內, 攪勻.  待滾起後冚蓋, 用中細火煮1小時45分鐘, 最後放百里香及迷迭香入煲內攪勻, 煮15分鐘. 熄火焗1/2小時便可出鍋.

P.S.
a.  煮牛尾時要打開煲蓋翻動1至2次, 因為洋蔥很容易黐煲底.

b.  加熱水炆牛尾, 目的可以保持食物既溫度, 不會忽冷忽熱, 

c.  有骨既肉類, 例如牛尾, 豬唐排, 豬西施骨, 整隻雞等都要冷水放入煲內. 咁樣就可以將d肉, 骨內既血水迫出嚟; 如果淨係肉, 例如豬展, 豬瘦肉等,  就熱水放d肉入煲內, 咁就可以迫d血水出嚟.










   
     

肉類如何汆水

午飯時和同事閒聊講開, 她說每次煲湯,  所有肉類都汆咗水, 佢老公投訴d湯有肉腥味.  這個情況, 我都試過, 後來我問過一位阿姨, 她告訴我, 肉類是咁樣汆水的.....


有骨既肉類, 例如牛尾, 豬唐排, 豬西施骨, 整隻雞等都要冷水放入煲內. 咁樣就可以將d肉, 骨內既血水迫出嚟; 

如果淨係肉, 例如豬展, 豬瘦肉等,  就熱水放d肉入煲內, 咁就可以迫d血水出嚟.