豉椒炒蜆 (附食譜)

先前去街市, 經過魚檔, 忽然手臂被水彈到.  以為魚在水中擺尾巴.  回頭一看, 原來是你.....

咁生猛, 點可以唔帶你返屋企呢....

豉椒炒蜆   (4人份)

蜆  1斤  /  蒜頭  1個(小型)  /  乾辣椒  1-2隻  /   豆豉  3湯匙

調味料

A.  鹽  1/2茶匙    /  糖  1茶匙  /  食油  1湯匙

B.  糖  2茶匙  /  米酒  少許  /  清水  約30毫升

做法

1.  先將蜆洗淨, 用清水浸約30分鐘, 期間放一把刀在水內, 讓蜆把沙吐出.  然後將水倒去, 從新再注入清水, 把蜆浸住, 直至少蜆前才把水倒去.

2.  蒜頭去皮洗淨後和豆豉一起刴碎.  辣椒乾切粒後加入已刴碎既蒜頭豆豉, 然後用調味料A撈勻備用.

3.  燒熱油鑊, 用大火將蒜頭豆豉辣椒炒香, 跟住放蜆入鑊炒勻, 然後灑少許米酒及糖2茶匙炒勻, 放水約30毫升.  冚蓋轉中火焗4分鐘.  把鑊蓋拿起, 再炒2分鐘便可出鍋.

P.S.

a.  豆豉用鹽, 糖和食油撈勻, 可以袪除豆豉澀味.

b.  焗蜆既清水可以按個人喜好加多, 或減少.

小蚌意見 ~ 此菜配潮州白粥是絕配.

煲劇

煲電視劇是讓我腦袋休息既最佳方法. 對我來說, 感覺像是"瞬間轉移",  看似我也是劇內的一份子, 劇內發生的事, 又與我無關.  就像"隔岸觀火", 又不會被當作"就手旁觀"....

我會為.....

千頌伊跟都敏俊分離多時重聚, 而感動, 高興...
趙在熙遲遲不向張文貞表白, 而緊張....
甄環跟果郡王的孩子, 不知會否被雍正息破不是其親兒, 可能被殺, 而擔心....
安茜嫲嫲成為皇后跟如妃爭鬥成為犧牲品, 而感到氣憤....

我想現實生活中, 電視劇內發生的事情, 不是每個人都會遇到...
當我看過這些驚濤駭浪的事, 再看看發生在自己身上的事時, 
感覺驟然輕了一點. 
那你呢, 會有何感受呢......

麻辣手撕雞 (附食譜)

公司附近開咗間手撕雞專門店, 日日放工時間就排長龍.  我諗一定係好好食.  於是就買咗一隻同小蚌一齊食.  食過後, 刁咀既小蚌話........

........唔夠麻, 唔夠香, 食到有生辣椒味....


我納悶....... 反正有人話唔怕做白老鼠, 於是, 我就煮咗.....


麻辣手撕雞 (4人份)

材料
貴妃雞  1隻  

調味料
川花椒(又名大紅袍花椒)  3茶匙  /  韓國辣椒粉  1湯匙  /  辣椒乾 1 - 2隻  /  鹽  1茶匙  /  麻油  1茶匙  /  白芝麻  少許 

川花椒 (又稱大紅袍花椒)

花椒
(廣東滷水, 便是用這種花椒的)

做法
1.  去燒臘店買貴妃雞或者白切雞, 然後將雞肉撕成小塊.

2.  燒熱鑊, 唔好落油, 將川花椒放入鑊內, 炒至聞到香味, 即熄火, 再在鑊內炒多1分鐘.  然後拿出來, 將川花椒及辣椒乾磨成粉. 

3.  燒熱鑊, 唔洗放油, 將所有雞皮放入鑊內, 慢火將雞油煎出, 然後將雞油拿起備用.

4.  將川花椒粉與辣椒粉, 鹽撈勻. 

5.  將4及雞油, 麻油, 白芝麻放入雞絲內撈勻便可.

P.S.
a.  韓國辣椒粉有粗粒及幼粒.  兩者皆可用.  唔用韓國辣椒粉, 其他辣椒粉都可以.

b.  唔太食得辣既, 要將辣椒乾去核和將辣椒粉份量減少, 自行調教至適合自己口味.  

c.  如果唔食得辣, 可以唔加辣椒粉, 將川花椒分量多加少許, 作增加香味.  川花椒本身唔辣, 只會有香味和, 食起上嚟會有點痲既感覺.

d.  鹽既份量先落一半, 而雞肉亦要先試味.  如果雞肉唔夠咸, 鹽既份量可以多加; 相反, 鹽份量要減.   

e.  如果雞皮煎出嚟既油唔夠, 可以將食油煮熱代替.

f.  白芝麻買回來之後, 要燒熱鑊, (記得唔好落油) 用中火炒至香及轉金黃色. 攤凍放入樽內.  平時食湯麵可以加點,  食起來會好食好多. 

g.  唔去燒臘店買雞, 可以去凍肉店買雞扒, 雞扒解凍後, 用幼鹽醃1 - 1.5小時, 將雞皮拿去煎油; 雞肉隔水蒸15-20分鐘.  雞肉攤凍便可拆肉.

h.  如果加一d青瓜絲, 食起上嚟會更加清爽.


**  幸好考試合格



廣東花椒照片來源
http://commons.wikimedia.org/wiki/File:%E8%8A%B1%E6%A4%92_Zanthoxylum.jpg

回憶

當我嗅到麵包店散發烘麵包時的香味......
我會想起幼稚園時上課的零碎片段, 因為學校樓下有一間麵包店........

回家時嗅到煮飯炒菜的香味.......
我會想起孩提時和表哥表姐遊玩, 嬉戲時的愉快情境, 因為姑媽屋企外邊的走廊會見到廚房的窗戶.......

每當嗅到炆冬菇的香味.........
我會想起孩提時, 每逄過時過節, 媽媽在煮飯, 我焦急地等待表哥表姐來我家, 和我玩"煮飯仔".  因為"炆冬菇"這個菜式我家過節必有的........

味道, 會帶給我很多愉快既回憶, 那麼, 你呢?  什麼會使你想起愉快的回憶.....

罐頭

當你假期唔想出街, 深夜睇睇吓電視肚餓, 夜收工街市收檔無嘢賣.  罐頭就係你既救星.  所以我家廚房會常備午餐肉, 五香肉丁, 豆豉鯪魚, 沙丁魚, 咸牛肉, 珍珠筍, 粟米湯.  當然一定會有公仔麵, 銀絲米粉, 蝦子麵啦!

梅菜 ~ [冬瓜梅菜肉丸湯 (附食譜)]

梅菜是一種非常好用的醃菜.  它可以用嚟蒸淡水魚(例如鯇魚, 大魚), 豬肉.  我比較特別, 有時我會用嚟炒翠肉瓜.  

在烹調前, 我會先用生抽, 糖, 食油及少許鹽醃梅菜 (大約5-10分鐘)

梅菜有分咸梅菜, 甜梅菜.  我比較喜歡用甜菜用, 因為無咁咸, 味道容易掌握.  

最愛就係用嚟做冬瓜肉丸湯.  每當夏天, 天氣太熱, 唔係好想食飯, 我都會煮一大煲湯當晚飯.  小蚌每次都會飲兩大湯碗.....

冬瓜梅菜肉丸湯  (4人份)

材料

冬瓜  1斤  /  豬瘦肉  1/2斤  /  甜梅菜  1/2棵(小型)  /  薑  2片

調味料

A.  生抽  2茶匙  /  糖  2茶匙  /  鹽 1/2茶匙  /  食油  2茶匙

B.  米酒  1湯匙  /  胡椒粉  2茶匙  /  粟粉  1茶匙  /  鹽  1/2茶匙  /  水 30亳升

做法

1.  梅菜用水浸15分鐘, 渣乾水, 切幼粒, 用調味料A醃10分鐘.

2.  將水, 薑片放入煲內, 用大火煲至水滾.

3.  冬瓜去皮及囊, 洗淨切大粒或小件備用.

4.  水滾後, 將冬瓜放入滾水內, 待水滾後煮10分鐘.

5.  豬肉刴碎, 用調味料B醃15分鐘.  之後與梅菜撈勻.

6.  最後將碎豬肉搓成肉丸, 然後放入熱水內煮.  待肉丸浮上湯面, 用中火煮20分鐘便成.

P.S.

a.  如覺得唔夠咸, 可以在調味料B內, 按個人需要酌量加鹽.

b.  若用急凍豬肉, 及沒有完全解凍的急凍豬肉, 調味料B內的水要減15毫升.  因為沒有完全解凍既豬肉, 肉內會含水份.

c.  怕豬肉有騷味, 那就要在醃豬肉時多加2茶匙薑末.

荷蘭豆炒鴨胸 (附食譜)

喜歡食鴨, 因為佢肉味帶有咸香(個人認為), 不喜歡的人會話嗰種味太"騷".

荷蘭豆炒鴨胸  (4 人份)

材料

生鴨胸  2個 (凍肉店有售)  /  荷蘭豆  1斤

調單料

生抽  2湯匙  /  糖  1湯匙  /  胡椒粉  1湯匙    /  米酒  3湯匙  /  食油  2茶匙

獻汁

馬蹄粉 2茶匙    /  水 2湯匙

做法

1.  荷蘭豆去根, 洗淨備用.

2.  生鴨胸解凍, 洗淨, 去皮, 肉切片.  鴨肉用調味醃15分鐘.  鴨皮切粒備用.

3.  燒熱鑊(不用落油), 放一半鴨皮落鑊, 用小火去煎來引出鴨油.  鴨油引出後, 將鴨皮拿起, 然後放荷蘭豆落鑊, 炒勻, 然後讚米酒.  再炒勻, 然後拿起備用.

4.  再燒熱鑊, 將餘下的鴨皮放落鑊, 用小火去煎引出鴨油. 鴨油引出後, 將鴨皮拿起.  跟住放鴨肉落鑊, 炒至鴨肉7成熟, 跟住將荷蘭豆回鑊. 炒勻, 將調味獻汁放入鑊,  炒勻便可上碟.

P.S.

a.  鴨肉太熟會韌, 所以在鑊炒至9成熟, 其餘1成由鴨肉離鑊的餘溫完成.

b.  馬蹄粉做獻汁, 當獻汁攤凍之後不會變成水汪汪.

c.  去鴨皮才切片炒, 是不想餸菜太多油, 如果就咁用食油去炒, 就大失風味. 

d.  想快解凍個鴨胸, 記得要連膠袋放入水內(如附圖).  咁就唔會怕d水浸無曬肉香味.

報紙

每朝返工, 總有幾份報紙等你攞, 所以屋企一定會有好多報紙.  看罷, 通常都會丟進垃圾桶. 或放在垃圾桶旁, 留給清潔工人賣掉, 多掙點外快.  但我總會替自己留起數份.  

報紙除咗睇內裡的新聞, 還可以...

將乾身無水的葉菜類蔬菜, 在放入雪櫃前, 用報紙先行包裹, 這樣可以將蔬菜的水份減慢被雪櫃抽乾.  

報紙可以放在抽屜底, 吸去部份既濕氣.  

玻璃窗骯髒了, 想回復光亮.  就把玻璃水嘖在玻璃窗上, 用報紙擦乾玻璃水.

還有, 聽長輩講過, 戰後艱辛的日子, 不是每個人可以有張厚厚棉被, 睡一個暖笠笠的覺.   有一張報紙, 把它放在薄薄的被單下, 已經是幸福不了.......