凍豆腐

外出食火鍋, 都會有凍豆腐(又名蜂巢豆腐).  呢個凍豆腐十分之用好.  除可以做火鍋料外, 還可以用來炆, 放湯, 炒.....

豆腐有幾種, 軟豆腐, 硬豆腐, 布包豆腐.  

做凍豆腐實在是十分簡單,  在菜市場買豆腐回來.  只需將豆腐略為沖水.  用淡鹽水浸30分鐘(目的是令豆腐不容易散), 再用保鮮袋包好, 放入冰櫃內.  冰最少4天, 便可以使用.

個人喜歡用布包豆腐作凍豆腐,  因為它咬落鬆軟有彈性.  但又無烤麩咁厚重.

鯪魚肉生菜湯 (附食譜)

現在普通超市, 新鮮食材已經不再局限豬, 牛, 雞肉.   琴日我就響普通超市見到有鯪魚肉賣.  所以就煮咗個既簡單, 又快靚正既菜式.....

鯪魚肉生菜湯  (4人份)

材料

西生菜  1個(或者唐生菜 1斤)  /  鯪魚肉  半斤  /  陳皮  1/2個  /  薑  2片

調味料

a.  魚露  1湯匙  /  胡椒粉  2茶匙  /  粟粉  1湯匙

b.  水  適量

做法

1.  先將陳皮用水浸軟, 之後把嚢刮丟, 然後刴成蓉備用.

2.  將水, 薑片放入煲內, 然後將水煲滾.

3.  將陳皮蓉和調味料a放入鯪魚肉內, 單一方向攪勻直至魚肉起膠,  然後將清水逐少加入待魚肉吸收後, 再加入少量水. 直到魚肉攬起來成杰湖狀.

4.  將生菜洗淨, 切條備用.

5.  水滾後把鯪魚肉搓成球狀, 放入滾水內, 待水再滾起後煮15分鐘.

6.  最後放生菜入鍋, 待水再滾起後5分鐘便可出鍋.

P.S.

**a.  鯪魚肉必須要單一方向攪動, 若不, 魚肉是會散開, 不會起膠及成團狀的.

    b.  有時間準備的話, 可以將蝦米浸軟刴碎, 加入魚肉內.  食起嚟會香好多.

    c.  響魚肉內加水, 食起來會軟滑一點, 有點像魚腐.  唔加水, 可以加1隻雞蛋(中型)代替.

蝦殼

假日和友人飲茶, 見到隔離枱食客點咗碗雲吞麵, 便和友人談起, 在家很難做到像雲吞麵店般那麼鮮味的雲吞麵湯底.  多得友人提點告知, 原來麵店的雲吞麵湯底是有用蝦殼來肴的.

做法是先燒熱鑊, 不需要落油, 鑊內放入已洗淨的蝦殼, 用中火煎蝦殼至微焦. (煎時需不時翻動蝦殼, 使蝦殼能平均受熱) 然後落少許鹽炒勻.  跟住讚米酒炒勻.  最後讚熱水, 蝦湯滾20分鐘便可.

回家試做後, 比起雲吞麵店仍有一大段距離, 但總比我以前只用雞粉開水做湯底鮮味得多.

物盡其用 VS 環保

小時候.....

哥哥姊姊穿著的毛衣, 絨褸, 用過的教科書, 都會留給弟弟妹妹穿和用的...

破舊的衣服, 阿嫲會將完好部份剪成小布片,  將小布片從新組合起來, 用來做被袋, 夏天蓋的薄被,   小孩食飯用的圍兜,  孭帶....

用來放雜物的箱, 都是問相熟的生果檔要來的紙皮箱.  如果遇上要搬家, 需要大量紙皮箱, 才去其他的生果檔, 買紙皮箱...

食完的花生醬, 果醬, 即沖飲品的樽, 媽必定會洗淨, 用來放鹽, 糖, 蝦米, 陳皮等等的調味料或食物....

以前去街市買菜, 肉或者魚,  不是用膠袋盛載.  而是用"咸水草"扎實的.  那些"咸水草", 媽必定會洗淨, 好好收藏, 留待端午節, 用來包糉.

講起包糉 , 食完的糉葉, 媽必定會把完整, 大片的糉葉洗淨, 吹乾.  收藏好, 留待明天再用.

家裡電器壞了, 總會拿去修理電器的小店舖修理, 直到不能再修理, 才會買新的.

最深印象的, 就是電飯煲蓋中央是那塊玻璃片.  每隔一段時間, 用來箍緊玻璃片的膠圈便因經常受熱而鬆弛.  媽媽總會到修理電器店內買膠圈, 自己換上.....

物件總要物盡其用,  對我而言是很自然, 理所當然的事.  而物盡其用的部份意義, 也即現在人們講既"環保"...

"物盡其用"給我的感覺, 較"環保"良好.  或許我覺得那些環保戰士總是將宣傳重點, 放在"提出及放大, 問題所在",  而忽略咗, "提供, 解決所在的問題"

這些問題如果能一朝半日可以解決到的. 便不是問題.  他們何不在, 未能解決問題時, 多提供一些緩衝辦法, 去舒緩那些問題.  

我想廚師會懂改善, 一碟被投訴, 又咸又多油既乾炒牛河, 多過, 一碟被投訴, 唔好食既乾炒牛河....

雞蛋

雞蛋當然係廚房必備既食材.

只用蛋, 便可以做到多款快, 靚, 正美食.

無時間準備既.....
蒸水蛋, 煎荷包蛋, 炒蛋, 爣蛋, 賽螃蟹, Bouche egg...

有時間準備既....
加點乾貨, 如...
~ 蝦米, 冬菇 => 日式蒸蛋
~ 紫菜  => 紫菜蛋花湯.....

有時間去超市買材料既...
要快煮, 就用罐頭啦.
~ 午餐肉  => 餐肉炒蛋
~ 咸牛肉  => 咸牛肉炒蛋
~ 五香肉丁  => 五香肉丁炒蛋
~ 粟米蓉  => 粟米湯

要用新鮮食材....
~ 蕃茄  => 蕃茄炒蛋
~ 洋蔥  =>  洋蔥炒蛋
~ 煙肉  =>  煙肉洋蔥炒蛋
~ 涼瓜  =>  涼瓜蛋餅
~ 薯仔 +  洋蔥  =>  薯仔蛋餅 (Tortilla)....

手套

膠手套對我而言是十分重要的.  洗碗, 洗地必須要有佢.

除咗膠手套, 醫生手套也對我很重要.   特別是冬天, 雙手浸在冰冷的水裡, 手指的關節都殭硬.  有時切菜也會帶點困難.  沒有佢, 冬天煮飯真係特別難過....









以前唔懂得物盡其用, 每當膠手套其中一隻爛咗, 就會連另外一隻無爛既膠手套都會棄掉.

現在, 我會把爛的膠手套換上新的, 和沒有爛的那隻一起用.  待舊的那隻爛了, 才再換上新的.

如果剩下2隻膠手套都是右手, 我會將其中一隻右邊膠手套, 反轉來用.  通常反轉膠手套後, 會在手套內灑上梳打粉, 那會較容易穿上.

有時也會在棄掉爛膠手前, 我會把手碗以下部份剪下來, 留1至2塊.  用來幹嗎......

當放在雪櫃的蠔油, 茄汁樽蓋被雪硬了的醬汁黏實時, 實在是很難打開的.  這時, 便可以用膠手套塊包裹著樽蓋, 加少許力, 便可以像平常一樣輕鬆地打開樽蓋了.  


雖然坊間也有些用矽膠做成的方塊, 此方塊也可以用作打開難開的樽蓋, 也可以當隔熱墊用.  但當我發現可以用膠手套作代替時,  我會將用來買矽膠方塊的錢, 去買另的東西.....

油鹽水煮花蛤 (附食譜)

今早去街市市場, 見到花蛤很新鮮, 於是便買回來.  用小蚌最愛的方法去煮, 就是....

油鹽水煮花蛤  (4人份)

材料  

花蛤  1斤  /  薑  4-5片  /  蔥  2棵

調味料

鹽  少許  /  米酒  少許

做法

1.   先將花蛤洗淨, 然後用水浸30分鐘.  其間水內放一柄刀.  目的是讓花蛤把沙粒吐出.  然後將水倒出, 再注入新鮮清水浸著, 直至煮才再把水倒去.

2.  薑, 蔥洗淨.  薑切片, 蔥切段備用.

3.  把沙鍋燒熱, 放油入鍋內,  油熱後放薑片及蔥段入鍋內爆香, 跟著放花蛤入沙鍋內炒勻.  然後放少許鹽入內炒勻,  再放米酒入鍋內.  隨即蓋上鍋蓋.  大火煮3分鐘, 把鍋蓋打開, 再炒勻便可出鍋.

P. S.

花蛤本身帶咸, 放鹽在內, 只是把花蛤的鮮味帶出.  所以不能多放. 

蒸魚

上星期去阿媽度食飯, 發現咗呢樣工具......

呢個工具係用嚟去魚鱗的.  你可能會覺得奇怪, 買魚時, 魚販咪劏乾淨條魚.  點解仲要買呢個工具...

魚最好食, 就係活魚, 所以買到活魚, 我一定會要求魚販將魚"放血, 不用打鱗及去魚內臓", 自己劏.  

魚點解會有腥味, 是因為魚死後, 魚血最快變壊, 所以唔新鮮既魚, 就會有腥味.  

呢條魚就係放咗血, 才將魚內臓攞出嚟.  你睇魚肚既肉既白.  因為d血流乾淨.

以前我唔係太喜歡食魚, 因為唔識煮, 特別係蒸魚, 次次蒸完條魚好似"柴皮".  小蚌愛食魚, 他見我成日蒸到d魚好似"柴皮", 某日終於忍唔住話我知.... 蒸魚其實唔係好難, 只要注意一下, 就可以好好食.....

蒸魚既時間...

視乎魚既重量, 魚背厚薄也有關係.  魚背厚的話, 可以響魚背用刀界開幾刀, 又或者多蒸1分鐘.

通常1斤重或以下既魚, 蒸8分鐘就可以, 但如果條開邊攤開嚟蒸, 6-7分鐘都可以喇.

用蔥將條魚墊起, 可以使魚受熱平均一點.  也可以將蔥既香味薰向魚上.  唔喜歡太重蔥味, 可以用即丟筷子代替.

蒸完條魚發現條魚好乾....

呢個問題好簡單, 只要臨放條魚落鑊蒸前, 響魚面淋少少油.  咁條魚蒸出嚟就唔會似"柴皮"喇.

香氣....

要食起嚟齒頰留香, 魚蒸完後, 碟內會有好多水, 為咗唔會稀釋豉油, 我會將魚汁倒出, 將蔥絲放響魚面, 然後將滾油淋響蔥面上, 蔥香味會即時散發.  最後淋豉油響魚面上, 便可以上枱.

也許你發覺我蒸魚點解無放薑, 因為我習慣將薑片放在魚肚內, 咁食既時候, 可以好快用筷子將薑夾起. 

寂寞

有時候, 我也會有她那樣的感覺.....

有時人是需要獨處的.  寂寞其實不是那麼可怕.....



照片來源
Fox Movies ~ Hope Springs